UNIDÁ va celebrar el 8 de setiembre n'Avilés col lema Asturies SÍ ye Nación

La coalición entama'l cursu políticu puxando por una política que nun arrequexe otra vuelta a Asturies nuna reforma estatutaria próxima

UNIDÁ informa de dalgunes de les actividaes previstes pal 8 de setiembre que fueron apautaes polos partíos integrantes de la coalición que se presentó per primer vez a unes elecciones autonómiques y municipales el pasáu mes de mayu, obteniendo representación en varios ayuntamientos.
La Xunta coordinadora de la coalición que se constituyó de cara a les elecciones del pasáu mes de mayu, y que yá tien calter estable, avanzó güei que van llevar hasta Avilés los actos del 8 de setiembre col llema 'Asturies SÍ ye Nación'.
L'actu central de la xornada va ser un mitin políticu nel que van intervenir responsables de la coalición, tres del que va haber una xinta d'hermandá.
Los portavoces d'UNIDÁ concretaron que "apautóse realizar los actos n'Avilés ya que per una parte nesta localidá constituyóse la primer agrupación local de la coalición y esta ye una forma de sofitar el trabayu de los y les militantes na comarca, y per otra, pa denunciar la situación que sufre un Avilés que carez abondo la crisis social, cultural y ecolóxica del país".
Nesti sen dende UNIDÁ tamos por tresmitir a la sociedá asturiana'l 8 de setiembre la otra cara de la moneda del país idílicu y festivu d'Areces recalcando que sí ye posible articular polítiques alternatives en clave asturiana, d'izquierdes y ecoloxistes.
La llínea argumental de les celebraciones del 8 de setiembre va espeyar que "énte los intentos de reforma estatutaria del PSOE que pretenden caltener a Asturies como una comunidá de tercera división, y nel contestu d'un futuru cercanu nel que distintos territorios del Estáu tán afirmando la so realidá nacional, ye importante recordar qu'Asturies SÍ ye una nación y que nun puede ser arrequexada por tanto al vagón de cola del Estáu".
L'actividá central del programa que se ta ultimando nestos momentos va ser un mitin político nel que van intervenir representantes d'UNIDÁ, tanto a nivel nacional como local, y nel que se va contar cola participación de colectivos sindicales y sociales con presencia n'Asturies,nel que se va recordar especialmente la efemeride del 70 aniversariu de la proclamación de la soberanía por parte del Conseyu Soberanu.
Nesti sen, señalaron los portavoces d'UNIDÁ "pretendemos afirmar el 8 de setiembre como una xornada de reivindicación nacional asturiana y recordaremos la necesidá d'un modelu de financiación que s'axuste a les nuestres necesidaes, de la oficialidá de la llingua asturiana y d'un modelu de desarollu sostenible pal país".